पुणे : रिपब्लिकन पार्टी ऑफ इंडियाच्या (आठवले गट) पुणे महानगरपालिकेतील पक्ष कार्यालयाचे रविवारी, २३ जून रोजी केंद्रीय सामाजिक न्याय राज्यमंत्री रामदास आठवले यांच्या हस्ते उद्घाटन करण्यात आले.
महापालिकेच्या नवीन इमारतीमध्ये सर्व पक्षांना आणि पदाधिकाऱ्यांना भव्य कार्यालये देण्यात आली आहेत. त्यात पहिल्या मजल्यावरील रिपब्लिकन पक्षाचे सुसज्ज असे कार्यालय उभारले आहे. पक्ष कार्यालयाच्या प्रवेशद्वारावर भारतीय संविधानाची उद्देशिका लावण्यात आली असून, कार्यालयात डॉ. बाबासाहेब आंबेडकर आणि संसद भवन यांचे एकत्रित चित्र बसविण्यात आले आहे. आतमध्ये असलेल्या अँटी चेम्बरमध्ये पंढरीच्या वारीचे सुंदर चित्रण करण्यात आले आहे.
रामदास आठवले यांनी पक्ष कार्यालयाच्या या सुसज्जतेबद्दल गटनेत्या सुनीता वाडेकर आणि परशुराम वाडेकर यांचे कौतुक केले. या वेळी रिपब्लिकन पक्षाच्या कार्यकर्त्यांना आठवले यांनी शुभेच्छा दिल्या. या वेळी उपमहापौर डॉ. सिद्धार्थ धेंडे, रिपब्लिकन पक्षाचे प्रदेश सचिव बाळासाहेब जानराव, पश्चिम महाराष्ट्र युवक आघाडीचे अध्यक्ष परशुराम वाडेकर, अल्पसंख्याक आघाडीचे अयुब शेख, शहराध्यक्ष अशोक कांबळे, राष्ट्रीय निमंत्रक अॅड. मंदार जोशी, सरचिटणीस महिपाल वाघमारे, कार्याध्यक्ष संजय सोनवणे, नगरसेविका सुनीता वाडेकर, हिमाली कांबळे यांच्यासह इतर कार्यकर्ते उपस्थित होते.